Hendr Bfuideifl
Schwäbische Gedichd, Gschichda, Aneggdoda,
Schbrich, Weisheida, Rohdschläg, Widds
2010 im Eigenverlag
Auflage 50 Vorabdrucke ohne Bilder, Preis 9 €
Leseprobe
Mooher ao
Den kenne doch
där guggd me ao so oo
als dädr me kenna.
Solle da Huad lubfa
ond ehn griasa
vielleichd kenndr me no.
Odr deisch i mi
ond i moin
i dädn kenna?
Wennr mi kenna däd
heddr doch glei griasd!
Odr siedr schlechd
dassr me nemme erkenna ko?
Solle ed uffn zuaganga
ehm uffd Schuldra schlaga
ond saga
mir kenned ons doch!
Abr wie i den kenn
kennd der mi ed
ond i kenn den erschd rechd ed –
mooher ao?
Saubr
I hao
saubr gweschne Hoor
saubre Aora
a buddsde Noos
schdeng ed aus dr Gosch
hann an saubra Halds
saubre Fengrneegl
kurdse Zaianeegl
koine Schwoisfias!
I bee a saubrer Kerle!
I hann blos
dreggige Gedanga!
Uffm Wasa . . .
Gedichte und Geschichten rund ums Cannstatter Volksfest
In Schwäbischer Mundart von Claus Ambrosius
mit Zeichnungen von Angelika Ambrosius
1982 im Eigenverlag
Auflage 1000 – vergriffen
Leseprobe
A Härz fir dii
Schäddzle,
suach dr a Läbkuachahärz aus,
was willsch denn fir ois,
i zaal drs ao.
Des mid
Mai Härzle
Mai Deible
Blos dii alloi.
Sag schao,
gäll, s felld dr schwär,
bei soviil Härza
s reachde zom fenda!
Oder des doo,
Mai Moggele
Mai Scheiserle
I hao dii soooo liab
Mai Sonnaschai.
Jedzd sag doch abr endlich
was de fir ois meechdesch.
Sonschd mached dia noh zua
ond mir schdanded emmer noh doo rom.
Du daobe Nuss!
Horch, edds pfeifd a andrar Weed
Anthologie
1980 Autorenverlag Der Stocherkahn
Auflage 500 – vergriffen
Leseprobe
Dr Färnsäär isch hee
Dr Färnsäär isch hee,
was doo?
Erschd muas mr
de wiadiche Kendr
ond d Frao beruicha.
No froogd mr de Kendr:
Solla mr a Schbiil macha?
Was isch a Schbiil,
wia good dees?
Oddr wia ischs,
wemmr amol Radio haered?
Dees isch langweilig,
machd koen Schbass!
Wia ischs
wemmr noh schbaziira ganged?
Noe! Bei däam Wäddr
jagd mr jo koen Hond naus!
Solla mr noh
a Ronde middam Audo faara?
Dr Jong moend:
wemmr oonaedich durch d Gegend faarad,
wia willschn do noh
en dr guada Lufd
romlaofa kenna!
No sag i zor Frao:
Komm, ganga mr
hald ens Bedd!
Se saed:
Bass abbr uff,
dass niggs bassiird!
Zom Bossa friß i Zongawururscht
Schwäbische Mundart ond Zeichnonga
1979 im Eigenverlag
Auflage 100 nummeriert – vergriffen
Leseprobe
Bäsawiirdschaft
Do kommsch nei
d Beng send druggd vool
abr d Leid rugged zamma.
No hoggsch noo
dei Virtele Zabfarääsr schtoot glei uffm Disch
d Leit schwäddsed mid dr
do bischt glei wia drhoem.
Do hoests glei
i bee dr Schorsch
ond wia hoescht du?
Do wäant Liadr gsonga
Widds vrzeelt
ond wenn noh oenr sei Giddarr drbei hot
no isch dr Deifl laos.
No goots bis zom Morga
zwischanei noh a baar Zwiiblkuacha
ond äwll wiidr Zabfarääsr.
Wennde Gligg hoscht
bischt bsoffa.
